Carchar i dwyllwyr Facebook Marketplace

Mae dau ddyn a ddefnyddiodd ap bancio ffug i dwyllo 27 o werthwyr diniwed i roi eitemau drud iddyn nhw wedi cael eu carcharu.

Cyfaddefodd Bernie McDonagh, 20, a Thomas McDonagh, 23, i sicrhau nwyddau a gafwyd trwy dwyll gwerth bron i £70,000 rhwng mis Ionawr 2023 a mis Medi 2023.

Roedd y par yn gweithredu ar draws ardal chwe gwasanaeth heddlu - Gwent, De Cymru, Dyfnaint a Chernyw, Dorset, Avon a Gwlad yr Haf a Dyfed-Powys - gan gysylltu â phobl a oedd yn gwerthu eitemau ar Facebook Marketplace, yn defnyddio’r enw Rosemary Baker i ddechrau, cyn defnyddio ffugenwau eraill.

Pan oedden nhw’n casglu’r eitemau, roeddent yn defnyddio ap bancio ffug a oedd yn cynhyrchu neges ffug bod trosglwyddiad wedi’i gwblhau. Wedyn roedden nhw’n gadael gyda’r nwyddau heb i’r taliad gael ei wneud.

Dangosodd delweddau teledu cylch cyfyng y ddau ohonynt mewn gwahanol siopau CeX – siop lle mae pobl yn gallu prynu a gwerthu nwyddau ail law – yn gwerthu’r eitemau, gan gynnwys ffonau clyfar, gliniaduron, ac oriorau drud, yr oedden nhw wedi eu cael trwy dwyll.

Plediodd y ddau ohonynt yn euog i gynllwynio i gyflawni twyll trwy ymhoniad anwir yn gynharach eleni a chawsant eu dedfrydu yn Llys y Goron Caerdydd ddydd Iau 21 Mai. Derbyniodd Bernie McDonagh ddedfryd o 18 mis o garchar a derbyniodd Thomas McDonagh ddedfryd o 19 mis o garchar.

Dywedodd y swyddogion yn yr achos, Ditectif Gwnstabl Benjamin Phillips a Ditectif Gwnstabl Matthew Emberton: “Teithiodd y McDonaghs i fyny ac i lawr de orllewin y wlad yn cymryd mantais o aelodau diniwed y cyhoedd a oedd yn ceisio gwerthu eu nwyddau ar-lein.

“Roedden nhw’n ddigywilydd, yn annog y gwerthwyr diniwed i dynnu lluniau o’r negeseuon trosglwyddiad banc ffug ynghyd a lluniau o’r diffynyddion eu hunain a’u car, mewn ymgais i guddio eu twyll.

“Rydyn ni’n argymell unrhyw un sy’n gwerthu eitemau ar-lein i ofyn am daliad arian parod neu PayPal. Os ydych chi’n hapus i dderbyn trosglwyddiad banc, arhoswch i’r taliad glirio cyn trosglwyddo’r nwyddau. Gwnewch eich ymchwil a gwiriwch adolygiadau ar wefannau fel eBay, Vinted a Depop.”

Arestiwyd trydydd dyn, Patrick O’Brien, yn rhan o’r ymchwiliad yma, ond bu farw yn ystod yr ymchwiliad felly daeth yr achos yn ei erbyn i ben.

Derbyniodd bachgen 17 oed Orchymyn Atgyfeirio am bedwar mis yn Llys Ieuenctid Caerdydd y llynedd am ei ran yn y twyll hefyd.

Mae rhagor o gyngor ynghylch prynu a gwerthu ar-lein yma: https://www.gwent.police.uk/news/gwent/news/news/2021/may/selling--buying-online--be-aware/

Os ydych chi’n credu eich bod chi wedi dioddef twyll ar-lein, dywedwch wrth Report Fraud:  https://www.reportfraud.police.uk/