Gwahardd gyrrwr am bedair blynedd yn dilyn marwolaeth menyw mewn gwrthdrawiad angheuol

Bydd dyn o Gaerffili yn cael ei wahardd rhag gyrru am bedair blynedd ar ôl cyfaddef iddo achosi marwolaeth menyw ac anafu dwy arall yn ddifrifol.

Ymddangosodd Ronald Dowling, o Salop Street, Caerffili, yn Llys y Goron Merthyr Tudful ddydd Mawrth 13 Hydref ar ôl pledio’n euog yn flaenorol i achosi marwolaeth drwy yrru’n ddiofal a dau gyhuddiad o achosi anaf difrifol drwy yrru’n ddiofal.

Roedd Dowling, 66, yn gyrru Maserati Ghibli llwyd ar yr A4042, ger cylchfan Rechem rhwng Cwmbrân a Phont-y-pŵl, pan gollodd reolaeth ar ei gerbyd mewn tywydd gwlyb a gwrthdaro ag Audi du tua 1.30pm ar 26 Hydref 2023.

Aethpwyd â gyrrwr yr Audi, Sharon Berry, 54, o ardal Pen-y-bont ar Ogwr, i’r ysbyty ag anafiadau a oedd yn peryglu ei bywyd, lle y bu farw yn ddiweddarach.

Cafodd dwy fenyw o ardal Caerffili, y ddwy ohonynt yn 66 oed bellach, anafiadau difrifol yn y gwrthdrawiad ac aethpwyd â nhw i’r ysbyty.

Dywedodd Cwnstabl Heddlu Clease, o Uned Ymchwilio i Wrthdrawiadau Heddlu Gwent:

“Mae hwn yn achos trasig sydd wedi arwain at farwolaeth ddiangen ac anafiadau difrifol i ddau berson arall.

“Hoffwn ddiolch i bawb a gynorthwyodd ein hymchwiliad ac estynnaf fy nghydymdeimlad dwysaf i deulu a ffrindiau Sharon Berry.

“Mae ein meddyliau gyda theulu Sharon wrth iddyn nhw barhau i ailadeiladu eu bywydau.

“Nid oedd gyrru Ronald Dowling yn cyrraedd y safon ofynnol, ofalus, roedd yn gyrru’n wael ac yn ddiofal ar ffordd wlyb, ac arweiniodd hynny at ganlyniadau dinistriol.

“Mae’r achos hwn yn dangos mor eithriadol o bwysig yw hi bod pobl yn gyrru’n ofalus ym mhob tywydd. Mae gyrru diofal yn difetha bywydau.

“Mae hyn yn atgoffa pawb sy’n mynd y tu ôl i’r llyw bod cyfrifoldeb arnoch chi nid yn unig i sicrhau eich bod chi eich hun yn ddiogel ond i sicrhau bod pawb o’ch cwmpas chi’n ddiogel hefyd.”

Cafodd Dowling ddedfryd o 27 mis wedi’i gohirio am ddwy flynedd a chafodd ei orchymyn i wneud 250 o oriau o waith di-dâl.

Cafodd hefyd ei wahardd rhag gyrru am bedair blynedd.