Ynglŷn â gwrandawiadau camymddwyn
Oherwydd natur ein gwaith a nifer y swyddogion a gyflogir gennym, mae honiadau o arfer gwael neu anghyfreithlon yn erbyn unigolion yn codi. Ein dyletswydd ni yw ymchwilio i bob un o’r achosion hyn. Gall y rhain arwain at wrandawiad camymddwyn cyhoeddus.
Diben gwrandawiadau cyhoeddus
Mae gwrandawiadau camymddygiad yn cael eu cynnal i gyflwyno ffeithiau'r achos ac i ganiatáu i'r person esbonio’i ymddygiad a'r amgylchiadau sy'n gysylltiedig â'r honiad. Gall tystion gael eu galw hefyd i roi tystiolaeth.
Diben gwrandawiad cyhoeddus yw dangos bod ein system ddisgyblu yn agored ac yn dryloyw. Bydd yn dangos ein bod yn dal swyddogion sy'n torri safonau ymddygiad proffesiynol, neu'r rhai lle profir bod yna gamymddygiad, yn atebol am eu gweithredoedd.
Pwy all fod yn bresennol?
Gall unrhyw aelod o’r cyhoedd neu’r wasg wneud cais i fynychu gwrandawiad camymddwyn, ar yr amod eu bod yn 18 oed neu hŷn.
Rydym yn dyrannu lleoedd yn y gwrandawiad ar sail y cyntaf i'r felin.
Sylwch y gall y cadeirydd hefyd benderfynu gosod amodau eraill cyn neu yn ystod y gwrandawiad.
Gwneud cais am fynd i wrandawiad
I wneud cais am le mewn gwrandawiad, edrychwch ar y rhestr o wrandawiadau camymddwyn sydd i ddod a chwblhewch ein ffurflen archebu gyflym a syml. Os oes lle ar gael byddwn yn anfon e-bost cadarnhau atoch.
Allwn ni ddim ad-dalu unrhyw dreuliau y byddwch yn eu hysgwyddo wrth fynd i wrandawiad.
Sylwch
Weithiau bydd gwrandawiad camymddygiad yn cael ei ganslo ar fyr rybudd. Yn y sefyllfaoedd hyn gwnawn ein gorau i roi gwybod ichi, ond efallai na fydd yn bosibl. Mae'n ddrwg gennym os bydd hyn yn digwydd i chi.
Newidiadau i'w disgwyl
Weithiau, fydd gwrandawiad camymddygiad ddim yn cael ei gynnal yn gyhoeddus, neu ran yn unig fydd yn cael ei chynnal yn gyhoeddus. I benderfynu hyn, mae'r cadeirydd yn ystyried:
- diogelwch gwladol
- a yw hyn yn ymyrryd ag atal neu ddatrys troseddau
- lles y partïon dan sylw
Os bydd y cadeirydd yn penderfynu na ddylai'r dystiolaeth sydd i'w rhoi gan dyst neu unrhyw un arall gael ei datgelu’n gyhoeddus, fe fydd yn gofyn i'r cyhoedd gael eu symud o'r gwrandawiad.
Amodau mynediad
Gall y sawl sy'n cadeirio gwrandawiad benderfynu gosod amodau penodol ynglŷn â’r gwrandawiad. Gallai'r rhain gynnwys:
- gofyn i bobl sy'n mynd i'r gwrandawiad gofrestru a dod â manylion adnabod dilys gyda nhw
- cyfyngu ar yr hyn y caniateir dod ag ef i ystafell y gwrandawiad, neu i'r adeilad lle cynhelir y gwrandawiad
- cyfyngu ar nifer y bobl a all fynd i’r gwrandawiad
- cyfyngiadau ar ohebwyr
- peidio â chaniatáu ffotograffau, fideo na recordio sain
- peidio â gadael i bobl ddod i mewn ar ôl i'r gwrandawiad ddechrau
Darllenwch ein hamodau mynediad i gael rhagor o wybodaeth am fynychu gwrandawiad camymddwyn.
Hygyrchedd
Lle bynnag y bo modd, bydd ein lleoliadau yn cynnwys mynedfeydd a chyfleusterau i bobl anabl ond does dim modd gwarantu hyn. Rhowch wybod inni ymlaen llaw am eich anghenion ac fe geisiwn wneud trefniadau ar eich cyfer, neu roi gwybod i chi os na allwn ni.
Rydym yn croesawu gohebiaeth yn Gymraeg a byddwn yn ymateb yn Gymraeg.
Os hoffech ohebu yn Gymraeg ynglŷn â’r Gwrandawiad, anfonwch e-bost atom ni. Mae gwasanaethau cyfieithu ar gael.
Tribiwnlysoedd apeliadau’r heddlu
Mae tribiwnlysoedd apeliadau'r heddlu yn gwrando apeliadau yn erbyn dyfarniad o gamymddygiad difrifol, sef apeliadau sy’n cael eu dwyn gan swyddogion heddlu neu gwnstabliaid arbennig.Gall aelodau o’r cyhoedd fynd i wrandawiadau apeliadau fel sylwedyddion ond nid ydynt yn cael cymryd rhan yn y trafodion.