Cyfamod y Lluoedd Arfog

Heddlu Gwent a Chyfamod y Lluoedd Arfog

Mae Heddlu Gwent wedi addo cefnogi Cyfamod Cymunedol y Lluoedd Arfog, menter gan y llywodraeth i hybu gwell dealltwriaeth a chydweithrediad rhwng y lluoedd arfog a'r cyhoedd.

Beth yw Cyfamod y Lluoedd Arfog?

Mae Cyfamod y Lluoedd Arfog yn cynrychioli addewid gan y genedl i gefnogi personél milwrol a'u teuluoedd. Mae'n addewid gwirfoddol sy'n cydnabod y dylid trin y rheini sy'n gwasanaethu neu wedi gwasanaethu yn y lluoedd arfog, a'u teuluoedd, gyda thegwch a pharch gan y cymunedau, economi a'r gymdeithas y maent yn eu gwasanaethu gyda'u bywydau.

Y Cynllun Cydnabod Cyflogwyr

Mae ymrwymiad Heddlu Gwent i gefnogi cymuned y Lluoedd Arfog wedi cael ei gydnabod gan Gynllun Cydnabod Cyflogwyr Cyfamod y Lluoedd Arfog. Mae'r Cynllun yn cydnabod cefnogaeth gan sefydliadau i gymuned y Lluoedd Arfog, ac mae Heddlu Gwent yn falch i fod wedi derbyn Gwobr Arian y Cynllun Cydnabod Cyflogwyr.

Mae Gwobr Arian Cynllun Cydnabod Cyflogwyr y Weinyddiaeth Amddiffyn yn wobr uchel ei bri sy’n cydnabod cyflogwyr sydd wedi dangos eu cefnogaeth i gymuned y Lluoedd Arfog drwy weithredu polisïau ymarferol yn y gweithle.

Mae'r heddlu'n un o 17 o sefydliadau yng Nghymru sydd wedi derbyn Gwobr Arian Cynllun Cydnabod Cyflogwyr y Weinyddiaeth Amddiffyn ar gyfer 2023.

I gyflawni statws Arian:

• Rhaid i ni ddangos yn rhagweithiol nad yw cymuned y Lluoedd Arfog o dan anfantais annheg fel rhan o’n polisïau recriwtio.
• Rhaid i ni sicrhau bod ein gweithlu’n ymwybodol o’n polisïau cadarnhaol tuag at faterion sy’n effeithio ar bersonél Amddiffyn, yn cynnwys Lluoedd Wrth Gefn, cyn-filwyr, a gwŷr a gwragedd priod a phartneriaid y rhai sy'n gwasanaethu yn y Lluoedd Arfog.
• Rydym wedi cael ein henwebu gan ein cyflogwyr sydd wedi addo cefnogi'r Lluoedd Arfog a'u haelodau, gan gynnwys gweithwyr presennol a gweithwyr posibl yn y dyfodol.
• Rydym wedi llofnodi Cyfamod y Lluoedd Arfog, gan ddangos ein hymrwymiad i gefnogi cymuned y lluoedd arfog.