Cwnstabliaid Gwirfoddol

Daw gwirfoddolwyr ar gyfer y Gwnstabliaeth Arbennig o amrywiaeth eang o gefndiroedd a chymunedau. Efallai eich bod gartref, yn gofalu am deulu, neu’n dilyn gyrfa mewn diwydiant gwahanol iawn. Mae’r amrywiaeth o brofiad sydd gan y Gwnstabliaeth Arbennig yn cefnogi gwasanaeth yr heddlu a’i nod yw cynrychioli’r cymunedau y mae’n eu gwasanaethu.

Fel cwnstabl arbennig, byddwch yn ymdrin ag amrywiaeth o ddigwyddiadau. Bydd adegau pan gewch brofiad o wrthdaro; byddwch yn arestio pobl dan amheuaeth ac yn ymdrin â digwyddiadau trallodus. Byddwch yn gefn i bobl mewn angen ac yn gwneud gwahaniaeth gwerthfawr i gymuned Gwent. Byddwch yn derbyn pecyn hyfforddi cynhwysfawr a fydd yn rhoi ystod o wybodaeth a sgiliau i chi.

Mae cwnstabliaid arbennig yn cefnogi’r heddlu i fynd i’r afael â throsedd, anhrefn ac ymddygiad gwrthgymdeithasol ac i feithrin perthynas â chymunedau. Fel arfer maen nhw’n gwirfoddoli am ryw 16 awr y mis, a drefnir yn hyblyg yn ôl ymrwymiadau personol a gwaith.

Cefnogir cwnstabliaid arbennig gan dimau penodedig ym mhob heddlu, a fydd yn annog gwirfoddolwyr i gyflawni digon o oriau i sicrhau bod eu hyder, eu sgiliau a’u profiad yn tyfu.

Rydym yn croesawu ceisiadau gan bobl o bob cefndir, diwylliant, crefydd, oedran, rhywedd a chyfeiriadedd rhywiol. Fodd bynnag, mae rhai amodau cymhwysedd y bydd angen i bob ymgeisydd eu bodloni, felly mae angen i chi wirio eich bod yn bodloni ein gofynion cyn cyflwyno cais:

• Byddwch yn 17 oed neu'n hŷn i wneud cais (fodd bynnag, dim ond yn 18 oed y bydd yn cael ei benodi).
• Rhaid i chi fod yn ddinesydd Prydeinig, neu'n ddinesydd gwlad sy'n aelod o'r Ardal Economaidd Ewropeaidd (EEA), y Gymanwlad neu’n wladolyn tramor sy’n byw yn y DU heb gyfyngiadau. Rhaid i chi fod wedi byw yn y DU am dair blynedd yn olynol yn union cyn gwneud cais. Mae hyn er mwyn bodloni'r gofyniad i wirio cefndir pob ymgeisydd yn gyfartal ac ar hyn o bryd nid oes gan wasanaeth Heddlu'r DU unrhyw fodd o hwyluso gwiriadau cefndir tramor i'r graddau sy'n ofynnol gan bobl sydd wedi bod yn byw yn y DU. Ni fydd ymgeiswyr na ellir gwirio eu cefndir yn gallu cael eu penodi.
• Peidio â bod yn aelod o’r Blaid Genedlaethol Brydeinig (BNP) na sefydliadau eraill fel Combat 18 neu’r Ffrynt Cenedlaethol.
• Os oes gennych gofnod troseddol, nid yw hyn yn golygu eich bod yn anghymwys yn awtomatig. Mae’n dibynnu ar natur eich euogfarn. Datganwch unrhyw rybudd neu euogfarn a gawsoch ar eich ffurflen gais. Bydd peidio â gwneud hynny yn golygu eich bod yn methu’r broses archwilio oherwydd materion uniondeb.
• Os ydych yn cael trafferth gyda dyled, efallai y byddwch yn dal yn cael gwneud cais. Mae angen i chi roi tystiolaeth i ni o’ch gallu i reoli eich dyledion yn llwyddiannus. Fodd bynnag, os oes gennych unrhyw Ddyfarniadau Llys Sirol yn weddill neu os ydych yn fethdalwr heb ei ryddhau, rydych yn anghymwys yn awtomatig.
• Nid yw tatŵau sy’n cael eu hystyried i fod yn sarhaus yn dderbyniol. Gofynnir i chi ddarparu lluniau o unrhyw datŵau ar eich wyneb, dwylo, blaenau eich breichiau neu eich gwddf. Bydd y rhain yn cael eu hasesu i weld a ydynt yn addas ar gyfer rôl swyddog gweithredol.

Nid yw cwnstabliaid arbennig yn cael tâl gan eu bod yn gweithio’n wirfoddol. Fodd bynnag, byddwch yn cael hawlio treuliau. Hefyd, byddwch yn derbyn:

• Cefnogaeth a chyngor gan ein cymdeithasau staff a’n rhwydweithiau cymorth gan gynnwys – Cymdeithas Yr Heddlu Benywaidd, Rhwydwaith LGBT, Cymdeithas yr Heddlu Du, Cymdeithas Gristnogol yr Heddlu, Y Rhwydwaith Cymorth Gallu, Ffederasiwn yr Heddlu, Unison, GMB.
• Lles – Mae gennym ni Uned Iechyd Galwedigaethol fewnol, a all gynorthwyo gyda rhai anafiadau a geir ar ddyletswydd. Hefyd, gallwch elwa ar CareFirst, y rhaglen i gynorthwyo gweithwyr.
• Mynediad i gampfeydd penodol am bris gostyngol ledled ardal yr heddlu.

Os byddwch yn llwyddiannus yn y broses recriwtio, gofynnir i chi fynychu rhaglen hyfforddi fodiwlaidd. Bydd hyn yn dechrau gyda hyfforddiant i ddysgu’r pethau sylfaenol. Ar ôl i chi lwyddo yn yr arholiad cyntaf cewch eich sefydlu yn gwnstabl arbennig. Yna byddwch yn gadael hyfforddiant am rai wythnosau i gyflawni dyletswyddau ochr yn ochr â mentor, gan gwblhau cynllun datblygu personol. Yna caiff y broses hon ei hailadrodd nes eich bod wedi llwyddo yn yr holl elfennau sy’n angenrheidiol i ddod yn gwnstabl arbennig.

Yn dilyn eich profion yn y ganolfan asesu, mae amryw o gamau mewnol y bydd gofyn i chi eu cwblhau’n llwyddiannus hefyd:

Prawf ffitrwydd

• Bydd gofyn i chi fodloni’r safonau cenedlaethol ar gyfer swyddogion yr heddlu. Mae hyn yn cynnwys rhedeg yn ôl ac ymlaen i lefel 5/4 (prawf blîp).
• Os nad ydych yn bodloni’r safon y tro cyntaf, gallwch wneud y prawf eto (hyd at uchafswm o dair gwaith). Bydd hefyd yn ofynnol i chi wneud prawf ffitrwydd cyn eich penodi oddeutu chwe wythnos cyn y dyddiad penodi disgwyliedig ac mae’n rhaid i chi lwyddo gyda’r prawf i fynd i gam nesaf eich cais.

Profion cyffuriau a biometrig

• Bydd y prawf cyffuriau yn cynnwys ateb holiadur ynglŷn ag unrhyw feddyginiaeth rydych yn ei chymryd, neu wedi bod yn ei chymryd, a rhoi sampl gwallt.
• Bydd profion biometrig yn cynnwys cymryd olion bysedd a swab DNA (ceg), a gaiff ei wirio yn erbyn cronfa ddata genedlaethol.

Archwilio a geirdaon

• Mae angen geirdaon i gwmpasu o leiaf 5 blynedd o hanes cyflogaeth barhaus. Os nad ydych wedi bod mewn cyflogaeth ers 5 blynedd byddwn yn ceisio cael geirdaon o fyd addysg a gan bobl sy’n eich adnabod yn bersonol.

Holiadur ac apwyntiad archwiliad iechyd

• Bydd hyn yn cynnwys profion amrywiol, gan gynnwys clyw, golwg, sain, sbirometreg, adwaith a BMI. Y Swyddfa Gartref sy’n gosod safonau BMI ar gyfer swyddogion yr heddlu. Mae cylchlythyr presennol y Swyddfa Gartref 59/2004 yn nodi bod hyn rhwng 18 a 32.

Weithiau gall y gwiriadau cyn penodi hyn gymryd rhwng tri a chwe mis. Byddwch yn ymwybodol bod yn rhaid i chi fynychu unrhyw apwyntiadau yn eich amser eich hun, gan gynnwys eich apwyntiad ffitio lifrai.

Pan fyddwch chi wedi cwblhau’r holl wiriadau cyn cyflogi, byddwch yn symud i gam nesaf y broses.

Ar gyfer swyddi mewn lifrai, byddwch yn cael lle gyda’r garfan nesaf sydd ar gael ac yn cael apwyntiad i fesur a ffitio lifrai.

Caiff ein hamcanion cydraddoldeb ac amrywiaeth eu gorfodi drwy Fwrdd Cydraddoldeb ac Amrywiaeth sefydledig. Mae hyn yn dangos ein hymrwymiad i sicrhau ein bod bob amser yn trin ein cydweithwyr a’r cyhoedd â thegwch, urddas a pharch.

Darperir ein rhaglen cymorth i weithwyr gan CareFirst ac am ddim i bawb ac mae ar gael 24 awr y dydd drwy gydol y flwyddyn. Mae’r rhaglen yn darparu cymorth cyfrinachol ar gyfer problemau a all effeithio ar berfformiad, iechyd, a lles meddyliol ac emosiynol.

Mae gennym ni Uned Iechyd a Lles Galwedigaethol i’ch helpu i gynnal eich iechyd corfforol a seicolegol wrth weithio. Mae’r gwasanaeth yn gyfrinachol ac yn cynnwys gwasanaeth cwnsela.

Nod y tîm Iechyd Galwedigaethol yw cefnogi presenoldeb ac effeithiolrwydd drwy weithio’n rhagweithiol i leihau risgiau iechyd ac annog pobl i fod yn gyfrifol am eu hiechyd, eu ffitrwydd a’u lles eu hunain. Rydych chi hefyd yn gymwys i gael prawf llygaid am ddim.

Mae llawer o dimau chwaraeon i chi ymuno â nhw, gan gynnwys rhedeg, hoci, pysgota a phêl-droed. Mae cyfleusterau campfa am ddim hefyd mewn nifer o’n safleoedd.

Mae amrywiaeth o gymdeithasau, rhwydweithiau a grwpiau sy’n cynorthwyo ein gweithlu ac mae gan Heddlu Gwent ystod o fentrau a chynlluniau i helpu cyd-weithwyr i ddatblygu.

Mae ein rhwydweithiau staff yn cynnig cymorth a chyfeillgarwch i’n swyddogion, y staff a’r gymuned leol. Maen nhw’n gweithio i gynorthwyo a chynghori cydweithwyr yn genedlaethol ac rydym yn falch o’r rhan weithredol sydd ganddyn nhw o ran dylanwadu ar blismona ledled y DU.

Mae’r rhwydweithiau a’r cymdeithasau yn cynnwys:

• Rhwydwaith Cymorth Anabledd
• Menywod Gwent ym Maes Plismona (GWiP)
• Cymdeithas Lleiafrifoedd Ethnig Gwent (GEMA)
• Rhwydwaith LHDT
• Cymdeithas Gristnogol yr Heddlu
• Grŵp Cymorth Iechyd Meddwl
• Chwaraeon yr Heddlu Gwent
• Cymdeithas Uwch-arolygwyr Heddlu Gwent
• Rhwydwaith Siaradwyr a Dysgwyr Cymraeg
• Unison a
• Ffederasiwn yr Heddlu.

Dim ond Swyddogion yr Heddlu all ymuno â Ffederasiwn yr Heddlu, os ydych chi’n penderfynu ymuno â Ffederasiwn yr Heddlu, gallwch ddewis ymuno â chynllun yswiriant bywyd a’r dyfarniadau yn daladwy i’ch priod neu’ch partner, ac i unrhyw ddibynyddion. Yn ogystal â gallu cael yswiriant salwch ac afiechyd hanfodol, gallwch gael yswiriant, ar gost ffafriol, i dalu am unrhyw dreuliau cyfreithiol sy’n gysylltiedig â’ch swydd, a gallwch hefyd ddefnyddio’r cyfleusterau adsefydlu gorau.