Cronfa grantiau gan y Swyddfa Gartref yw Strydoedd Saffach sy'n cefnogi heddluoedd i atal, lleihau a mynd i'r afael â throseddau yn y gymdogaeth, ymddygiad gwrthgymdeithasol a thrais yn erbyn menywod a merched - pan mae’n digwydd, ble mae'n digwydd, cyn iddo ddigwydd.

Mae mwy o arian yn golygu mwy o weithredu

Yn ddiweddar gwnaethom sicrhau £746,702 o gyllid ychwanegol (y swm unigol mwyaf i ni ei dderbyn erioed) ar gyfer Strydoedd Saffach, i helpu i fynd i'r afael ag ymddygiad gwrthgymdeithasol a throseddau yn y gymdogaeth. 

“Mae gan bawb hawl i deimlo'n ddiogel yn yr ardaloedd lle maen nhw'n byw, ac rydyn ni wedi ymroi i amddiffyn a thawelu meddwl ein cymunedau.”

Ar hyn o bryd, rydyn ni'n defnyddio'r arian hwn i atal a mynd i'r afael ag ymddygiad gwrthgymdeithasol a throseddau eraill fel byrgleriaeth, lladrad a dwyn ledled chwe ardal yng Ngwent - Alway yng Nghasnewydd, Coed-duon, Brynmawr, Cil-y-coed, Cwmbrân a Thredegar.

Mynd i'r afael â throsedd, ymddygiad gwrthgymdeithasol a thrais yn erbyn menywod a merched

Rydyn ni'n gallu defnyddio'r arian Strydoedd Saffach hwn yn y ffordd rydyn ni a'n partneriaid cymunedol yn credu bydd yn fwyaf effeithiol i'ch cymuned chi. Rydyn ni'n gwneud pethau ymarferol fel gwelliannau diogelwch, CCTV ychwanegol, yn ogystal â defnyddio tactegau cudd i atal troseddau cymdogaeth a chamau dargyfeiriol i atal ymddygiad gwrthgymdeithasol.

Cydweithio i gadw pawb yn ddiogel

Nid yn unig mae'r arian yn golygu y gallwn gyflwyno mesurau ac ymgyrchoedd newydd i wella diogelwch y cyhoedd a mynd i'r afael â throseddau yn y gymdogaeth, ond - gyda'n partneriaid - gallwn barhau i fuddsoddi mewn gwaith ymgysylltu ac addysgu hollbwysig hefyd.

Rydyn ni'n gweithio i newid agweddau tuag at ymddygiad a gweithrediadau amhriodol. Rydyn ni'n rhoi cefnogaeth ymarferol i bobl sydd mewn perygl o ymddwyn yn wrthgymdeithasol yn y dyfodol. Ac, wrth gwrs, rydyn ni'n dal i ddwyn y rhai sy'n benderfynol o achosi niwed ac anhrefn gerbron y llysoedd.

Ymgysylltu â'n pobl ifanc - yn y ffordd sy'n addas iddyn nhw

Yn rhan o'n hymrwymiad i Strydoedd Saffach, rydyn ni'n rhoi man diogel i bobl ifanc fynd, ac mae rhaglenni allgymorth i addysgu pobl ifanc yn cael eu darparu gan weithwyr ieuenctid mewn llochesi a chanolfannau ieuenctid newydd neu rai wedi’u hadnewyddu.

Byddem yn falch iawn o glywed eich barn

Os hoffech chi rannu eich barn neu awgrymiadau gyda ni, neu os hoffech chi wybod mwy am y gwaith rydyn ni'n ei wneud yn eich ardal chi, e-bostiwch [email protected]

(Mae mwy o wybodaeth am ein prosiectau ac ymgyrchoedd Strydoedd Saffach presennol a rhai'r gorffennol ar y dudalen 'Ein gwaith hyd yn hyn')